ಬೆಂಗಳೂರು: ಶನಿವಾರ ಸುರಿದ ಭಾರಿ ಮಳೆಗೆ ಬಿನ್ನಿಪೇಟೆ ಪಾರ್ಕ್ ವೆಸ್ಟ್ ಅಪಾರ್ಟ್ಮೆಂಟ್ ಹಿಂಭಾಗ ಕಂಪೌಂಡ್ ಗೋಡೆ ಕುಸಿದು ಅವಾಂತರ ಸೃಷ್ಟಿಯಾಗಿದೆ. ಹತ್ತಡಿ ಎತ್ತರದ ಇಪ್ಪತ್ತು ಅಡಿ ಉದ್ದದ ಗೋಡೆ ರಸ್ತೆ ಮೇಲೆ ಉರುಳಿ, ಮನೆ ಮುಂದೆ ನಿಲ್ಲಿಸಿದ್ದ ಇಪ್ಪತ್ತಕ್ಕೂ ಹೆಚ್ಚು ಬೈಕ್ಗಳು ಜಖಂಗೊಂಡಿವೆ. ಗೋಡೆ ಕರೆಂಟ್ ಕಂಬದ ಮೇಲೆ ಬಿದ್ದು ಕಂಬವೂ ವಾಲಿದೆ.
“ಬಿಬಿಎಂಪಿ ಸಿಬ್ಬಂದಿ ಇನ್ನೂ ಸ್ಥಳಕ್ಕೆ ಬಂದಿಲ್ಲ. ಹೊರಬಾರಲಾಗದೆ ಒದ್ದಾಡುತ್ತಿದ್ದೇವೆ. ಗೋಡೆ ಕುಸಿತದಿಂದ ಡ್ರೈನೇಜ್ ಪಿಟ್ಗಳೂ ಸಹ ಒಡೆದು ಹೋಗಿದೆ. ಬಿನ್ನಿಪೇಟೆ ಒಂದನೇ ಕ್ರಾಸ್ ಪೂರ್ತಿ ಡ್ರೈನೇಜ್ ಆಗಿದೆ” ಎಂದು ಸ್ಥಳೀಯರು ಹೇಳಿದರು.
ದ್ವೀಪದಂತಾದ ಮಹದೇವಪುರ ರಸ್ತೆಗಳು: ಮಹದೇವಪುರ ವಿಧಾನಸಭಾ ಕ್ಷೇತ್ರದ ರಸ್ತೆಗಳು ಸಂಪೂರ್ಣ ಜಲಾವೃತವಾಗಿವೆ. ಇಂದು ಬೆಳಗ್ಗೆ ಸಾರ್ವಜನಿಕರು ಹಾಗೂ ಆಮ್ ಆದ್ಮಿ ಪಕ್ಷದ ಕಾರ್ಯಕರ್ತರು ರಸ್ತೆಗಳಿದು ಆಕ್ರೋಶ ವ್ಯಕ್ತಪಡಿಸಿದರು.
