ಬೆಂಗಳೂರು: ಮಹಾರಾಷ್ಟ್ರದ ಉಜನಿ ಮತ್ತು ಸಿನಾ ಜಲಾಶಯಗಳಿಂದ ಭೀಮಾ ನದಿಗೆ ಭಾರಿ ಪ್ರಮಾಣದಲ್ಲಿ ನೀರು ಹರಿಬಿಟ್ಟಿದ ಪರಿಣಾಮ, ಕರ್ನಾಟಕದ ಕಲಬುರಗಿ, ಬೀದರ್ ಮತ್ತು ಯಾದಗಿರಿ ಜಿಲ್ಲೆಗಳ ಜನಜೀವನ ಸಂಪೂರ್ಣ ಅಸ್ತವ್ಯಸ್ತವಾಗಿದೆ. ಹಲವು ಹಳ್ಳಿಗಳು ಜಲಾವೃತಗೊಂಡು ದ್ವೀಪಗಳಂತೆ ತಲೆ ಎತ್ತಿವೆ. 8 ಸಾವಿರಕ್ಕೂ ಹೆಚ್ಚು ಜನರು ಮನೆಕಳೆದುಕೊಂಡು ಗಂಜಿ ಕೇಂದ್ರಗಳಲ್ಲಿ ಆಶ್ರಯ ಪಡೆದಿದ್ದಾರೆ.
ರಾಷ್ಟ್ರೀಯ ಹೆದ್ದಾರಿ 50 – ಎರಡನೇ ದಿನವೂ ಬಂದ್!
ಭೀಮಾ ನದಿಯ ಪ್ರವಾಹಕ್ಕೆ ನಡುಗುತಿರುವ ಕಟ್ಟಿಸಂಗಾವಿ ಸೇರಿ ಹಲವು ಸೇತುವೆಗಳು ಜಲಾವೃತಗೊಂಡಿದ್ದು, ರಾಷ್ಟ್ರೀಯ ಹೆದ್ದಾರಿ 50ಯ ಸಂಚಾರವನ್ನು ತಾತ್ಕಾಲಿಕವಾಗಿ ನಿಲ್ಲಿಸಲಾಗಿದೆ.
ಸಾವಿರಾರು ವಾಹನಗಳು ರಸ್ತೆಮೇಲೆ ನಿಂತಿದ್ದು, ಲಾರಿಗಳ ಜತೆಗೂಡಿ ದೀರ್ಘ ಟ್ರಾಫಿಕ್ ಜಾಮ್ ಸೃಷ್ಟಿಯಾಗಿದೆ.
SDRF ಕಾರ್ಯಾಚರಣೆ – ಜೀವ ರಕ್ಷಣೆ ಕಾರ್ಯ ತೀವ್ರ
ಜೇವರ್ಗಿ ತಾಲೂಕಿನ ಹಲವೆಡೆ ಸಿಲುಕಿದ್ದ ಜನರನ್ನು SDRF ಹಾಗೂ ಅಗ್ನಿಶಾಮಕ ದಳದ ಸಿಬ್ಬಂದಿ ರಕ್ಷಿಸಿ ಸುರಕ್ಷಿತ ಸ್ಥಳಗಳಿಗೆ ತಲುಪಿಸಿದ್ದಾರೆ. ಜನರು ತಮ್ಮ ಮನೆಯ ಮೇಲ್ಚಾವಣಿ ಅಥವಾ ಮರಗಳ ಮೇಲೆ ಕಾದು ಕುಳಿತಿರುವ ದೃಶ್ಯಗಳು ಮನಕಲಕುವಂತಿವೆ.
ಬದಲಿ ಮಾರ್ಗ ಸೂಚನೆ – ವಾಹನ ಸವಾರರಿಗೆ ಎಚ್ಚರಿಕೆ!
- ಫಿರೋಜಾಬಾದ್ ನ್ಯಾಷನಲ್ ಹೈವೇ 150 – ಪ್ರವಾಹದಿಂದ ಬಂದ್
- ಯಾದಗಿರಿ-ಶಹಾಪುರ ರಸ್ತೆ – ಸಂಚಾರ ಸ್ಥಗಿತ
- ಕಲಬುರ್ಗಿ-ಯಾದಗಿರಿ-ನಾರಾಯಣಪೇಟೆ (ತೆಲಂಗಾಣ) ಮಾರ್ಗಕ್ಕೆ ಬದಲಿ ಮಾರ್ಗ ಸೂಚಿಸಲಾಗಿದೆ
- ಬಾಗಲಕೋಟೆ ಜಿಲ್ಲೆಯ ನರಗುಂದ-ರೋಣ ರಸ್ತೆ ಕೂಡ ಬಂದ್
ಅನ್ನದಾತರ ಕಣ್ಣೀರು – ಬೆಳೆ ನಾಶ, ಭವಿಷ್ಯ ಅಂಧಕಾರ
ಯಾದಗಿರಿ ನಗರದ ಜನವಸತಿ ಪ್ರದೇಶಗಳಿಗೆ ನೀರು ನುಗ್ಗಿದ್ದು, ಜಿಲ್ಲೆಯ ಕ್ರೀಡಾಂಗಣವೂ ಸಂಪೂರ್ಣ ಜಲಾವೃತವಾಗಿದೆ. ನದಿ ನೀರು ಕೃಷಿ ಜಮೀನಿಗೆ ನುಗ್ಗಿ ಹೆಕ್ಟಾರ್ಸ್ನಷ್ಟು ಬೆಳೆ ನಾಶವಾಗಿದೆ. ರೈತರು ತಮ್ಮ ಬದುಕಿನ ನೆಲೆ ನಷ್ಟವಾಗಿರುವುದರಿಂದ ಕಂಗಾಲಾಗಿದ್ದಾರೆ.
ಬ್ರಿಜ್–ಕಮ್–ಬ್ಯಾರೇಜ್ಗಳ ನಾಶದಿಂದ ಸಂಪರ್ಕ ಕಡಿತ
- ಬಾಗಲಕೋಟೆ ಜಿಲ್ಲೆ: ಘಟಪ್ರಭಾ ನದಿಗೆ ಅಟ್ಟಲಾಗಿ ನಿರ್ಮಿಸಲಾಗಿದ್ದ 6 ಸೇತುವೆಗಳು ಮುಳುಗಿ ಸಂಪರ್ಕ ಕಡಿತವಾಗಿದೆ
- ಬೀದರ್ ಜಿಲ್ಲೆಯ ಔರಾದ್ ತಾಲೂಕಿನ ಸುಮಾರು 20ಕ್ಕೂ ಹೆಚ್ಚು ಹಳ್ಳಿಗಳ ಸಂಪರ್ಕ ಕಡಿತಗೊಂಡಿದೆ
For More Updates Join our WhatsApp Group :
