ಬೆಂಗಳೂರು: ಕಾರುಗಳಲ್ಲಿ ಸನ್ ರೂಫ್ ಇಲ್ಲದಿದ್ದರೆ ಆಕರ್ಷಣೆ ಕಡಿಮೆಯಾದಂತಾಗಿ ಹೋಗಿದೆ. ಆದರೆ, ಮೋಜಿಗಾಗಿ ಸನ್ ರೂಫ್ ಬಳಕೆ ಪ್ರಾಣಾಪಾಯಕ್ಕೆ ಕಾರಣವಾಗಬಹುದು ಎಂಬುದು ಇತ್ತೀಚಿನ ಘಟನೆಯಿಂದ ಮತ್ತೊಮ್ಮೆ ದೃಢಪಟ್ಟಿದೆ. ಬೆಂಗಳೂರಿನಲ್ಲಿ ಓರ್ವ ಬಾಲಕನಿಗೆ ಸನ್ ರೂಫ್ ಮೂಲಕ ತಲೆ ಹೊರಹಾಕಿದಾಗ “ಹೈ ಬೇರಿಯರ್” ತಗುಲಿ ಅಪಾಯ ಉಂಟಾದ ಘಟನೆ ನಡೆದಿದೆ. ಅದೃಷ್ಟವಶಾತ್ ಆತ ಪಾರಾಗಿದ್ದರೂ, ಪೊಲೀಸರು ಪ್ರಕರಣ ದಾಖಲಿಸಿ ಕಾನೂನು ಕ್ರಮ ಆರಂಭಿಸಿದ್ದಾರೆ.
ಯಾವ ಘಟನೆ? ಏನು ಪ್ರಕರಣ?
ಸೆಪ್ಟೆಂಬರ್ 6ರಂದು, ವಿದ್ಯಾರಣ್ಯಪುರ 7ನೇ ಬ್ಲಾಕ್, ಜಿಕೆವಿಕೆ ಡಬಲ್ ರಸ್ತೆನಲ್ಲಿ ಈ ಘಟನೆ ನಡೆದಿದೆ. ಕೆಂಪು ಬಣ್ಣದ ಮಹೀಂದ್ರ ಕಾರಿನ ಸನ್ ರೂಫ್ ನಲ್ಲಿ ನಿಂತಿದ್ದ ಬಾಲಕನಿಗೆ ಹೈ ಬೇರಿಯರ್ ತಲೆ ಬಡಿದಿದ್ದು, ತಕ್ಷಣದ ಅಪಾಯದಿಂದ ಪಾರಾಗಿದ್ದಾನೆ. ಆದರೆ, ಯಲಹಂಕ ಸಂಚಾರ ಪೊಲೀಸರು ಸ್ವಯಂಪ್ರೇರಿತವಾಗಿ ಪ್ರಕರಣ ದಾಖಲಿಸಿ BNS ಸೆಕ್ಷನ್ 125(A) ಮತ್ತು ಸೆಕ್ಷನ್ 281 ಅಡಿಯಲ್ಲಿ ಕ್ರಮ ಕೈಗೊಂಡಿದ್ದಾರೆ.
ಯಾವ ವಿಧದ ಶಿಕ್ಷೆ ಸಿಗಬಹುದು?
BNS ಸೆಕ್ಷನ್ 125(A):
ಇತರರ ಜೀವ ಅಥವಾ ಸುರಕ್ಷತೆಗೆ ಅಪಾಯ ಉಂಟುಮಾಡುವ ನಿರ್ಲಕ್ಷ್ಯ ಕೃತ್ಯ –
- ಯಾವುದೇ ಗಾಯವಿಲ್ಲದಿದ್ದರೆ: ಮೂರು ತಿಂಗಳ ಜೈಲು ಅಥವಾ ₹2,500 ದಂಡ ಅಥವಾ ಎರಡೂ.
- ಗಂಭೀರ ಗಾಯವಾದರೆ: ಮೂರು ವರ್ಷಗಳ ಜೈಲು ಅಥವಾ ₹10,000 ದಂಡ ಅಥವಾ ಎರಡೂ.
BNS ಸೆಕ್ಷನ್ 281:
- ಸಾರ್ವಜನಿಕ ರಸ್ತೆಯಲ್ಲಿ ಅಪಾಯಕಾರಿ ಚಾಲನೆ: ಆರು ತಿಂಗಳ ಜೈಲು ಅಥವಾ ₹1,000 ದಂಡ ಅಥವಾ ಎರಡೂ.
ಮೋಟರ್ ವಾಹನ ಕಾಯಿದೆ ಸೆಕ್ಷನ್ 177, 184:
- ಶಿಸ್ತು ಉಲ್ಲಂಘನೆ, ಅಪಾಯಕಾರಿ ಚಾಲನೆಗೆ ಸಹ ಶಿಕ್ಷೆ.
ತಜ್ಞರ ಎಚ್ಚರಿಕೆ
ಆಟೋಮೊಬೈಲ್ ತಜ್ಞ ಸಿದ್ದಾರ್ಥ ಶಿವಪ್ಪ ಮಾಹಿತಿ ಹಂಚಿಕೊಂಡು, “ಸನ್ ರೂಫ್ ಎಂಬುದು ವಾಸ್ತವವಾಗಿ ಗಾಳಿ ಮತ್ತು ಬೆಳಕಿಗಾಗಿ ನೀಡಿದ ವ್ಯವಸ್ಥೆ. ಇದರಲ್ಲಿ ನಿಂತು ಚಾಲನೆ ಮಾಡುವುದು ವೈಜ್ಞಾನಿಕವಾಗಿ ಹಾಗೂ ಕಾನೂನಾತ್ಮಕವಾಗಿ ತಪ್ಪು. ಈಗ ಕಡಿಮೆ ಬೆಲೆಯ ಕಾರುಗಳಲ್ಲೂ ಸನ್ ರೂಫ್ ಲಭ್ಯವಾದುದರಿಂದ, ಜನರು ಮೋಜಿನ ಪರಿಕಲ್ಪನೆಯಾಗಿ ಬಳಸುತ್ತಿದ್ದಾರೆ. ಇದು ಸಾರ್ವಜನಿಕ ಸುರಕ್ಷೆಗೆ ಭಾರೀ ಅಪಾಯ,” ಎಂದಿದ್ದಾರೆ.
ಮೋಜು ಮಾಡೋಕೆ ಮಿತಿಯಿರಲಿ!
ಈ ಪ್ರಕರಣವು ಆಪಾದಿತ “ಮೋಜು” ಜೀವಕ್ಕೆ ಏನು ಅಪಾಯ ತಂದೊಯ್ಯಬಹುದು ಎಂಬುದಕ್ಕೆ ನಿದರ್ಶನವಾಗಿದೆ. ಸನ್ ರೂಫ್‌ನಲ್ಲಿ ನಿಲ್ಲುವುದು ಕಾನೂನಿಗೆ ವಿರುದ್ಧ ಮತ್ತು ಆತ್ಮಹತ್ಯಾತ್ಮಕ ಕೃತ್ಯವಾಗಿದೆ. ಪೊಲೀಸರಿಂದ ಗಂಭೀರ ಕ್ರಮ ಕೈಗೊಳ್ಳುವ ಸಮಯ ಬಂದಿದೆ ಎಂದು ತಜ್ಞರು ಎಚ್ಚರಿಕೆ ನೀಡಿದ್ದಾರೆ.
For More Updates Join our WhatsApp Group :
