ಬೆಂಗಳೂರು: ಇವಿಎಂ ಯಂತ್ರಗಳ ಮೇಲೆ ನಂಬಿಕೆ ಇಲ್ಲ ಎಂಬ ಕಾಂಗ್ರೆಸ್ ನಿಲುವಿಗೆ ತೀವ್ರ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಇತ್ತೀಚೆಗೆ ನಡೆದ ರಾಜ್ಯ ಸಚಿವ ಸಂಪುಟ ಸಭೆಯಲ್ಲಿ ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ ಇವಿಎಂ ಬದಲು ಬ್ಯಾಲೆಟ್ ಪೇಪರ್ ಬಳಕೆಗೆ ತೀರ್ಮಾನ ಮಾಡಲಾಗಿದ್ದು, ರಾಜಕೀಯ ಜಗಳಕ್ಕೆ ನಾಂದಿ ಹಾಡಿದೆ. ಕಾಂಗ್ರೆಸ್ ಈ ನಿರ್ಧಾರವನ್ನು ಮತದಾನದ ನೈತಿಕತೆಯ ಪರವಾಗಿ ಸಮರ್ಥಿಸಿಕೊಂಡರೆ, ಬಿಜೆಪಿ ಇದನ್ನು “ಹೆಬ್ಬೆಟ್ಟಿನ ದಿನಗಳ” ನೆನಪಿನತ್ತ ಹಿಂತಿರುಗುವ ಹೆಜ್ಜೆಯೆಂದು ಟೀಕಿಸಿದೆ.
ಬೊಮ್ಮಾಯಿ ಹಾಗೂ ವಿಜಯೇಂದ್ರದ ಕಟುಪ್ರತಿಕ್ರಿಯೆ:
“ಇವಿಎಂ ಮೇಲೆ ನಂಬಿಕೆ ಇಲ್ಲವೇ? ಆದ್ರೆ 136 ಕ್ಷೇತ್ರಗಳಲ್ಲಿ ಗೆದ್ದಿರುವ ಕಾಂಗ್ರೆಸ್ ಶಾಸಕರು ರಾಜೀನಾಮೆ ನೀಡಿ ಮತ್ತೆ ಚುನಾವಣೆಗೆ ಮೊರೆ ಹೋಗಲಿ,” ಎಂದು ಬಿಜೆಪಿ ರಾಜ್ಯಾಧ್ಯಕ್ಷ ಬಿವೈ ವಿಜಯೇಂದ್ರ ಸವಾಲು ಹಾಕಿದ್ದಾರೆ.
ಮಾಜಿ ಸಿಎಂ ಬಸವರಾಜ ಬೊಮ್ಮಾಯಿ ಕೂಡ “ಸಿಎಂ ಸಿದ್ದರಾಮಯ್ಯ ರಾಜೀನಾಮೆ ನೀಡಿ, ಬ್ಯಾಲೆಟ್ ಮೂಲಕ ಮತ್ತೆ ಗೆದ್ದು ಬರುವಾಗ ಅವರ ಹೇಳಿಕೆ ನಿಜ ಅನಿಸುತ್ತದೆ” ಎಂದು ಟ್ವೀಟ್ ಮಾಡಿದ್ದಾರೆ.
ಕಾಂಗ್ರೆಸ್‌ನ ಸ್ಪಷ್ಟನೆ:
ಡಿಸಿಎಂ ಡಿಕೆ ಶಿವಕುಮಾರ್ ಈ ಕುರಿತು ಪ್ರತಿಕ್ರಿಯಿಸುತ್ತಾ, “ಜನರ ನಂಬಿಕೆಗಾಗಿ ನಾವು ಬ್ಯಾಲೆಟ್ ಪೇಪರ್ ಆಯ್ಕೆ ಮಾಡಿದ್ದೇವೆ. ಬಿಜೆಪಿ ಈ ವಿಚಾರದಲ್ಲಿ ಆತಂಕಪಡುತ್ತಿರುವುದು ಅವರ ದ್ವಂದ್ವ ನೀತಿಯ ಪ್ರತಿಫಲ” ಎಂದಿದ್ದಾರೆ.
ಸಿಎಂ ಸಿದ್ದರಾಮಯ್ಯ ಕೂಡ ಅನೇಕ ದೇಶಗಳು ಇವಿಎಂ ಬಿಟ್ಟು ಮತ್ತೆ ಮತಪತ್ರದತ್ತ ತಿರುಗಿವೆ ಎಂದು ಸಮರ್ಥನೆ ನೀಡಿದ್ಧಾರೆ.
ಚುನಾವಣಾ ಆಯೋಗದ ಪ್ರತಿಕ್ರಿಯೆ:
ರಾಜ್ಯ ಚುನಾವಣಾ ಆಯುಕ್ತರು, “ಕಾನೂನುಬದ್ಧವಾಗಿ ನಿಯಮಾವಳಿ ತಿದ್ದುಪಡಿಗೆ ಸರ್ಕಾರ ಮುಂದಾದರೆ, ಬ್ಯಾಲೆಟ್ ಪೇಪರ್ ಬಳಕೆಗೆ ನಾವು ಸಿದ್ಧ” ಎಂಬ ಸ್ಪಷ್ಟನೆ ನೀಡಿದ್ದಾರೆ.
ಮುಂದೇನು?:
ಈ ಬಗ್ಗೆ ಅಂತಿಮ ನಿರ್ಧಾರವು ಚುನಾವಣಾ ಆಯೋಗದ ಮೆಚ್ಚುಗೆಗೆ ಬದ್ಧವಾಗಿದೆ. ಈ ಮಧ್ಯೆ, ಕಾಂಗ್ರೆಸ್ ಹಾಗೂ ಬಿಜೆಪಿ ನಡುವೆ ಈ ವಿಷಯವಾಗಿ ಭಾರೀ ರಾಜಕೀಯ ಬಡಿದಾಟ ಮುಂದುವರೆದಿದ್ದು, ಮತದಾನ ವ್ಯವಸ್ಥೆಯ ಭವಿಷ್ಯ ಕುರಿತು ಕಾದುನೋಡಬೇಕಿದೆ.
For More Updates Join our WhatsApp Group :
