ಇತ್ತೀಚೆಗೆ ನಟಿ ಸಮಂತಾ ಅವರು ತಮ್ಮ ಇನ್ಸ್ಟಾಗ್ರಾಮ್ ಪುಟದಲ್ಲಿ ಹೈಡ್ರೋಜನ್ ಪೆರಾಕ್ಸೈಡ್ ಕುರಿತು ಪೋಸ್ಟ್ ಮಾಡಿ ಭಾರಿ ವಿವಾದವನ್ನು ಸೃಷ್ಟಿಸಿದ್ದರು. ಈ ವಿವಾದದ ನಡುವೆ ನಟಿ ನಯನತಾರಾ ತಮ್ಮ ಇನ್ಸ್ಟಾಗ್ರಾಮ್ ಪುಟದಲ್ಲಿ ರೆಡ್ ಟೀಯ ಪ್ರಯೋಜನಗಳ ಬಗ್ಗೆ ಪೋಸ್ಟ್ ಮಾಡಿ ವಿವಾದಕ್ಕೆ ಸಿಲುಕಿದ್ದಾರೆ.
ಇದರಿಂದ ವೈದ್ಯರು ಇದೀಗ ನಯನತಾರಾ ಪೋಸ್ಟ್ ಬಗ್ಗೆ ಟೀಕೆ ಮಾಡಿದ್ದಾರೆ. ಹಾಗಾದರೆ ಆ ಪೋಸ್ಟ್ನಲ್ಲಿ ನಯನತಾರಾ ಏನು ಹೇಳಿದ್ದಾರೆ ಎಂದು ನೋಡೋಣ.
ಪೌಷ್ಟಿಕತಜ್ಞ ಮುನ್ಮುನ್ ಗನೇರಿವಾಲ್ ಅವರ ಶಿಫಾರಸುಗಳ ಪ್ರಕಾರ ಇದೀಗ ನಯನತಾರಾ ತಮ್ಮ ಆಹಾರಕ್ರಮವನ್ನು ಬದಲಾಯಿಸಿದ್ದಾರೆ. ಇದಕ್ಕಾಗಿ ಗನೇರಿವಾಲ್ ಅನ್ನು ಶ್ಲಾಘಿಸಿರುವ ನಯನ ತನ್ನ ಇನ್ಸ್ಟಾಗ್ರಾಮ್ ಪುಟದಲ್ಲಿ ರೆಡ್ ಟೀ ತನ್ನ ನೆಚ್ಚಿನ ಚಹಾವಾಗಿದೆ ಎಂದು ಬರೆದುಕೊಂಡಿದ್ದಾರೆ.
ಇದು ತನ್ನ ಆಹಾರ ಯೋಜನೆಯಲ್ಲಿ ಅತ್ಯಂತ ಪರಿಣಾಮಕಾರಿ ಪಾನೀಯವಾಗಿದೆ ಎಂದು ನಯನ ಹೇಳಿದ್ದಾರೆ. ಇದಲ್ಲದೇ ಆಯುರ್ವೇದದಲ್ಲಿ ಬಹಳ ಹಿಂದಿನಿಂದಲೂ ರೆಡ್ ಟೀ ಬಳಸಲಾಗುತ್ತಿದೆ. ಇದರಲ್ಲಿ ಆಯಂಟಿ ಆಕ್ಸಿಡೆಂಟ್ ಹೇರಳವಾಗಿದ್ದು, ಮಧುಮೇಹ, ಕೊಲೆಸ್ಟ್ರಾಲ್, ಅಧಿಕ ರಕ್ತದೊತ್ತಡ, ಹೃದಯ ಸಂಬಂಧಿ ಕಾಯಿಲೆಗಳಿಗೆ ಇದು ತುಂಬಾ ಒಳ್ಳೆಯದು. ಅಲ್ಲದೆ ಇದು ದೇಹಕ್ಕೆ ತಂಪು ನೀಡುತ್ತದೆ. ಮೊಡವೆಯಿಂದ ಬಳಲುತ್ತಿರುವವರಿಗೆ ಮಾನ್ಸೂನ್ ಸಮಯದಲ್ಲಿ ಪ್ರಯೋಜನಕಾರಿಯಾಗಿದೆ. ಯಾಕೆಂದರೆ ಈ ಚಹಾ ಪ್ರತಿರಕ್ಷಣಾ ವ್ಯವಸ್ಥೆಯ ಸಮತೋಲನವನ್ನು ಕಾಪಾಡಿಕೊಳ್ಳಲು ಸಹಾಯ ಮಾಡುತ್ತದೆ. ಅಲ್ಲದೆ ಕಾಲೋಚಿತ ಸೋಂಕಿನಿಂದ ರಕ್ಷಿಸುತ್ತದೆ ಎಂದು ನಯನ ಅವರು ತಮ್ಮ ಇನ್ಸ್ಟಾಗ್ರಾಮ್ ಪೋಸ್ಟ್ನಲ್ಲಿ ಬರೆದಿದ್ದಾರೆ.
ಆದರೆ ಲಿವರ್ ಡಾಗ್ ಎಂದು ಕರೆಯಲ್ಪಡುವ ಡಾ. ಸಿರಿಯಾಕ್ ಅಬ್ಬಿ ಫಿಲಿಪ್ಸ್ ಅವರು ನಯನ ಅವರ ಈ ಪೋಸ್ಟ್ ಅನ್ನು ಟೀಕಿಸಿದ್ದಾರೆ. ನಯನತಾರಾ ಅವರ ಪೋಸ್ಟ್ಗೆ ಸಂಬಂಧಿಸಿದಂತೆ ಡಾ. ಸಿರಿಯಾಕ್ ತಮ್ಮ ಎಕ್ಸ್ ಸೈಟ್ನಲ್ಲಿ, “ನಯನತಾರಾ ದಾಸವಾಳದ ಚಹಾವನ್ನು ಕುಡಿದು ಅದರ ರುಚಿಯ ಬಗ್ಗೆ ಪ್ರತಿಕ್ರಿಯಿಸಿದ್ದಾರೆ. ದಾಸವಾಳದ ಚಹಾವು ಮಧುಮೇಹ ವಿರೋಧಿ, ಅಧಿಕ ರಕ್ತದೊತ್ತಡ, ಮೊಡವೆ ವಿರೋಧಿ, ಬ್ಯಾಕ್ಟೀರಿಯಾ ವಿರೋಧಿ ಎಂದು ನಯನ ಅವರು ಗಮನಿಸಿದ್ದಾರೆ. ಆದರೆ ನಯನ ಅವರು ಹೇಳುವಂತೆ ಕೆಂಪು ಚಹಾದಿಂದಾಗುವ ಆರೋಗ್ಯ ಪ್ರಯೋಜನಗಳನ್ನು ಬೆಂಬಲಿಸಲು ಸಾಕಷ್ಟು ವೈಜ್ಞಾನಿಕ ಪುರಾವೆಗಳಿಲ್ಲ” ಎಂದು ಡಾ. ಸಿರಿಯಾಕ್ ಹೇಳಿದ್ದಾರೆ.
ದಾಸವಾಳ ಸೌಮ್ಯವಾದ ರಕ್ತದೊತ್ತಡ-ಕಡಿಮೆಗೊಳಿಸುವ ಪರಿಣಾಮವನ್ನು ಹೊಂದಿರಬಹುದು ಎಂದು ಕೆಲವು ಅಧ್ಯಯನಗಳು ಸೂಚಿಸುತ್ತವೆಯಾದರೂ, ಈ ಫಲಿತಾಂಶಗಳು ನಿರ್ಣಾಯಕವಾಗಿಲ್ಲ. ಇದಕ್ಕೆ ಹೆಚ್ಚಿನ ಅಧ್ಯಯನದ ಅಗತ್ಯವಿದೆ. ದಾಸವಾಳದ ಚಹಾವು ರಕ್ತದಲ್ಲಿನ ಗ್ಲೂಕೋಸ್ ಅನ್ನು ಕಡಿಮೆ ಮಾಡುವ ಪರಿಣಾಮವನ್ನು ಹೊಂದಿದೆ ಎಂಬುದಕ್ಕೆ ಯಾವುದೇ ವಿಶ್ವಾಸಾರ್ಹ ಪುರಾವೆಗಳಿಲ್ಲ. ಆದ್ದರಿಂದ ಇದು ಮಧುಮೇಹಕ್ಕೆ ಸಹಾಯ ಮಾಡುವುದಿಲ್ಲ ಎಂದು ಡಾ. ಸಿರಿಯಾಕ್ ಹೇಳಿದ್ದಾರೆ.
ಅಲ್ಲದೆ ನಯನ ಅವರ ಮೊಡವೆ ಮತ್ತು ಅದರ ಬ್ಯಾಕ್ಟೀರಿಯಾ ವಿರೋಧಿ ಗುಣಲಕ್ಷಣಗಳನ್ನು ಕೆಂಪು ಚಹಾ ಹೊಂದಿದೆ ಎನ್ನುವ ಹೇಳಿಕೆಯನ್ನು ಡಾ. ಸಿರಿಯಾಕ್ ನಿರಾಕರಿಸಿದರು. ದಾಸವಾಳದ ಚಹಾ ಮಾನವರಲ್ಲಿ ಮೊಡವೆ ಅಥವಾ ಸೋಂಕನ್ನು ತಡೆಯುತ್ತದೆ ಎಂದು ಯಾವುದೇ ಅಧ್ಯಯನಗಳು ಸಾಬೀತುಪಡಿಸಿಲ್ಲ ಎಂದು ಡಾ. ಸಿರಿಯಾಕ್ ಹೇಳಿದ್ದಾರೆ.
ಹೀಗಾಗಿ ಸೆಲೆಬ್ರಿಟಿಗಳು ಯಾವುದೇ ವಿಷಯವನ್ನು ಹಂಚಿಕೊಳ್ಳುವಾಗ ಅದರ ನೈಜ ಮತ್ತು ವೈಜ್ಞಾನಿಕವಾಗಿ ಪರಿಶೀಲಿಸಿದ ಮಾಹಿತಿಯನ್ನು ಹಂಚಿಕೊಳ್ಳುವ ಅಗತ್ಯವಿದೆ. ವಿಶೇಷವಾಗಿ ಆರೋಗ್ಯಕ್ಕೆ ಸಂಬಂಧಿಸಿದ ವಿಷಯಗಳನ್ನು ಹಂಚಿಕೊಳ್ಳುವಾಗ ಹೆಚ್ಚು ಜಾಗರೂಕರಾಗಿರಬೇಕು. ಏಕೆಂದರೆ ಅನೇಕ ಸೆಲೆಬ್ರಿಟಿಗಳು ಸಾರ್ವಜನಿಕರಿಗೆ ಮಾದರಿಯಾಗಿದ್ದಾರೆ. ಜನರು ಸೆಲೆಬ್ರಿಟಿಗಳ ಮಾತುಗಳನ್ನು ನಂಬುವುದು ಮಾತ್ರವಲ್ಲದೆ ಅದನ್ನು ಅನುಸರಿಸುತ್ತಾರೆ. ಆದ್ದರಿಂದ ಸಾಮಾಜಿಕ ಪ್ರಭಾವಿಗಳು ಯಾವಾಗಲೂ ವಿಶ್ವಾಸಾರ್ಹ ಮಾಹಿತಿಯನ್ನು ಹಂಚಿಕೊಳ್ಳುವುದು ತುಂಬಾ ಮುಖ್ಯ ಎಂದು ವೈದ್ಯರು ಮನವರಿಕೆ ಮಾಡಿದ್ದಾರೆ.
