ಬೆಂಗಳೂರು: ಕರ್ನಾಟಕದಲ್ಲಿ ಮುಂಗಾರು ಪೂರ್ವ ಮಳೆಯೇ ವಾಡಿಕೆಗಿಂತ ಹೆಚ್ಚು ಸುರಿದಿದೆ. ಜೊತೆಗೆ ಮುಂಗಾರಿನಲ್ಲೂ ಭಾರಿ ಮಳೆಯಾಗುತ್ತಿರುವ ಹಿನ್ನೆಲೆ, ಕರಾವಳಿ ನಾಡಲ್ಲಿ ಶಾಲಾ-ಕಾಲೇಜುಗಳಿಗೆ ರಜೆ ಘೋಷಿಸಲಾಗಿದೆ. ಹೀಗಾಗಿ, ಮುಂಜಾಗ್ರತಾ ಕ್ರಮವಾಗಿ 61 ದಿನ ಮೀನುಗಾರಿಕೆಗೆ ನಿರ್ಬಂಧ ಹೇರಲಾಗಿದೆ. ಇದರಿಂದಾಗಿ ಮುಂದಿನ ದಿನಗಳಲ್ಲಿ ಸೀ ಫುಡ್ಗಳ ಬೆಲೆ ಏರಿಕೆಯಾಗುವ ಸಾಧ್ಯತೆ ಇದೆ.
ಕರಾವಳಿ ಕರ್ನಾಟಕದಲ್ಲಿ ಭಾರಿ ಮಳೆಯಿಂದಾಗಿ ಮೀನುಗಾರಿಕೆ ಚಟುವಟಿಕೆಗಳು ಸ್ಥಗಿತಗೊಂಡಿವೆ. ಇದರಿಂದ ಮೈಸೂರು ಸೇರಿದಂತೆ ಕರ್ನಾಟಕದ ಹಲವು ಜಿಲ್ಲೆಗಳಲ್ಲಿ ಮೀನಿನ ದರಗಳು ದುಪ್ಪಟ್ಟಾಗಿವೆ.
61 ದಿನ ಮೀನುಗಾರಿಕೆ ನಿಷೇಧ
ಈ ಬಾರಿ ಕರ್ನಾಟಕದಲ್ಲಿ ವಾಡಿಕೆಗಿಂತ ಹೆಚ್ಚಾಗಿ ಮುಂಗಾರು ಮಳೆಯಾಗುತ್ತಿದೆ. ಕಾವೇರಿ ಮತ್ತು ಕಬಿನಿ ಹಿನ್ನೀರಿನಿಂದ ಹಾಗೂ ಜಿಲ್ಲೆಯ ಕೆರೆ ಮತ್ತು ಕುಂಟೆಗಳಿಂದ ಮೈಸೂರಿಗೆ ಮೀನುಗಳು ಬರುತ್ತವೆ. ಆದರೆ, ಸಮುದ್ರ ಮೀನು ಹೆಚ್ಚು ರುಚಿ ಮತ್ತು ಪರಿಮಳವಿರುವ ಹಿನ್ನೆಲೆ, ಇವಕ್ಕೆ ಭಾರಿ ಬೇಡಿಕೆ ಇದೆ. ಅವು ಕರಾವಳಿ ಕರ್ನಾಟಕ, ಕೇರಳದಿಂದ ಮಾತ್ರ ಪೂರೈಕೆಯಾಗುತ್ತದೆ. ಆದರೆ, ಈ ಭಾಗದಲ್ಲಿ ಎಡಬಿಡದೆ ಮಳೆಯಾಗುತ್ತಿರುವ ಹಿನ್ನೆಲೆ ಪಶ್ಚಿಮ ಕರಾವಳಿಯಲ್ಲಿ 61 ದಿನ ಮೀನುಗಾರಿಕೆ ನಿಷೇಧ ಜಾರಿಯಲ್ಲಿದೆ.
ಎಲ್ಲ ರೀತಿಯ ಸೀಫುಡ್ಗಳ ಬೆಲೆ ಏರಿಕೆ
ನಿರ್ಬಂಧದಿಂದಾಗಿ ಮೀನುಗಳ ಕೊರತೆಯುಂಟಾಗಿ, ಮೀನಿನ ಬೆಲೆಗಳು ಗಗನಕ್ಕೇರಿವೆ. ಜೂನ್ನಲ್ಲಿ ಆರಂಭವಾದ ಈ ನಿಷೇಧವು ಮುಂಗಾರು ಮಳೆಯೊಂದಿಗೆ ಹೊಂದಿಕೆಯಾಗುತ್ತದೆ. ಮುಂಗಾರು ಸೀಸನ್ನಲ್ಲಿ ಸಮುದ್ರ ಜೀವಿಗಳು ಸಂತಾನೋತ್ಪತ್ತಿ ಹೆಚ್ಚು ಮಾಡುತ್ತವೆ. ಈ ಕಾರಣದಿಂದಾಗಿ ಪ್ರತಿ ವರ್ಷ ಈ ನಿಷೇಧವನ್ನು ವಿಧಿಸಲಾಗುತ್ತದೆ.
ಹೀಗಾಗಿ ಸದ್ಯದ ಪರಿಸ್ಥಿತಿಯಲ್ಲಿ ಮ್ಯಾಕೆರೆಲ್, ಸೀರ್ ಫಿಶ್ ಮತ್ತು ಬಿಳಿ ಹಾಗೂ ಕಪ್ಪು ಪಾಂಫ್ರೆಟ್ನಂತಹ ಜನಪ್ರಿಯ ಮೀನುಗಳ ಬೆಲೆಗಳು ಗಣನೀಯವಾಗಿ ಏರಿಕೆಯಾಗಿವೆ.
ಪಾಂಫ್ರೆಟ್, ಸೀರ್ ಫಿಶ್ ಮತ್ತು ಇಂಡಿಯನ್ ಸಾಲ್ಮನ್ ಕೆಜಿಗೆ 1,700 ರೂ.ಗಿಂತಲೂ ಹೆಚ್ಚು ಬೆಲೆಗೆ ಮಾರಾಟವಾಗುತ್ತಿವೆ. ಶಂಕರ ಮೀನು ಕೆಜಿಗೆ 800 ರೂ., ಚೆಂಬಲ್ಲಿ ತಳಿ ಕೆಜಿಗೆ 1,100 ರೂ.ಗೆ ಮಾರಾಟವಾಗುತ್ತಿವೆ. ಲಭ್ಯತೆಯ ಆಧಾರದ ಮೇಲೆ ದರಗಳು ಪ್ರತಿದಿನ ಬದಲಾಗುತ್ತವೆ ಎಂದು ಮೀನು ಮಾರಾಟಗಾರರು ಮಾಹಿತಿ ನೀಡಿದ್ದಾರೆ
ಕೆರೆ ಮೀನುಗಳ ಬೆಲೆಯಲ್ಲಿ ಸ್ಥಿರತೆ
ಕೆರೆ ಮೀನುಗಳ ಬೆಲೆಗಳು ಸ್ಥಿರವಾಗಿವೆ. ಕಟ್ಲಾ ಮತ್ತು ರೋಹು ಕೆಜಿಗೆ 180 ರಿಂದ 200 ರೂ.ಗೆ ಮಾರಾಟವಾಗುತ್ತಿವೆ. ಜಲೇಬಿ ಮತ್ತು ಇತರ ತಳಿಗಳು ಕೆಜಿಗೆ 160 ರೂ.ಗೆ ಮಾರಾಟವಾಗುತ್ತಿವೆ. ಪೂರ್ವ ಕರಾವಳಿಯಲ್ಲಿ ಮೀನುಗಾರಿಕೆ ನಿಷೇಧ ಈ ತಿಂಗಳು ಮುಕ್ತಾಯವಾಗುವುದರಿಂದ ಸೀ ಫುಡ್ಗಳ ಬೆಲೆಗಳು ಕಡಿಮೆಯಾಗಬಹುದು ಎಂದು ಹೇಳಲಾಗುತ್ತಿದೆ. ಕಳೆದ ಎರಡು ತಿಂಗಳಿಂದ ಸೀಗಡಿ ಮೀನುಗಳು ಸಿಗುವುದು ಕಷ್ಟವಾಗಿದೆ. ಹೀಗಾಗಿ ಹೋಟೆಲ್, ರೆಸ್ಟೋರೆಂಟ್ಗಳಲ್ಲಿ ಮೀನು ಆಹಾರಗಳ ಮೇಲಿನ ಬೆಲೆ ಹೆಚ್ಚು ಮಾಡಲಾಗಿದೆ.
ಮಳೆಗೆ ತರಕಾರಿ, ಚಿಕನ್, ಮಟನ್ ಬೆಲೆಯಲ್ಲೂ ಏರಿಕೆ
ಕೋಳಿ ಮಾಂಸದ ಬೆಲೆಯೂ ಸ್ವಲ್ಪ ಏರಿಕೆಯಾಗಿದ್ದು, ಚಿಕನ್ ಕೆಜಿಗೆ 220 ರೂ.ಗೆ ಮತ್ತು ವಿಥೌಟ್ ಸ್ಕಿನ್ ಕೆಜಿಗೆ 260 ರೂ.ಗೆ ಮಾರಾಟವಾಗುತ್ತಿದೆ. ಮಟನ್ ಪ್ರಸ್ತುತ ಕೆಜಿಗೆ 800 ರೂ.ಗೆ ಮಾರಾಟವಾಗುತ್ತಿದೆ. ಇತ್ತೀಚಿನ ಮಳೆಯಿಂದ ಸೊಪ್ಪಿನ ಪೂರೈಕೆಯೂ ಕಡಿಮೆಯಾಗಿದ್ದು, ಬೆಲೆ ಏರಿಕೆಯಾಗಿದೆ.
