ಟ್ರೆಕ್ಕಿಂಗ್ ಮಾಡುವುದರಿಂದ ಎಷ್ಟೇಲ್ಲಾ ಪ್ರಯೋಜನ ಪಡೆಯಬಹುದು ಗೊತ್ತಾ? ಆಗಾಗ್ಗೆ ಟ್ರೆಕ್ಕಿಂಗ್ ಮಾಡುವುದರಿಂದ ದೇಹದ ತೂಕವನ್ನು ಸುಲಭವಾಗಿ ಇಳಿಸಿಕೊಳ್ಳಬಹುದು. ರಕ್ತದೊತ್ತಡ ನಿಯಂತ್ರಣಕ್ಕೆ ಬರುತ್ತದೆ. ಮನಸ್ಸು ಒತ್ತಡದಿಂದ ಹೊರಬಂದು ಪ್ರಕೃತಿಯ ಭವ್ಯತೆಯನ್ನು ಆನಂದಿಸುತ್ತದೆ.
ಇಷ್ಟೇಲ್ಲಾ ಪ್ರಯೋಜನಕಾರಿಯಾದ ಟ್ರೆಕ್ಕಿಂಗ್ ಯುವಕರ ಫೇವರೆಟ್ ಹೊರಾಂಗಣ ಚಟುವಟಿಕೆಯಾಗಿದೆ. ವಾರಾಂತ್ಯ ಬರುತ್ತಿದ್ದಂತೆ ಚಾರಣಕ್ಕೆ ಜನರು ಯೋಜಿಸುತ್ತಾರೆ. ಮರೆಯಲಾಗದ ಟ್ರೆಕ್ಕಿಂಗ್ ಅನುಭವ ಪಡೆಯಲು ನೀವು ಕರ್ನಾಟಕದ ಇಂತಹ ತಾಣಗಳ ಪ್ರವಾಸ ಮಾಡಲೇಬೇಕು. ಹಾಗಾದರೆ ಆ ತಾಣಗಳು ಯಾವುವು ಎಂಬುದನ್ನು ಇಲ್ಲಿ ತಿಳಿಯಿರಿ.
ಝಡ್ ಪಾಯಿಂಟ್, ಕೆಮ್ಮಣ್ಣುಗುಂಡಿ
ಕರ್ನಾಟಕದ ಕೆಮ್ಮಣ್ಣುಗುಂಡಿ ಅದ್ಭುತವಾದ ಲೋಕ ಎಂದೇ ಹೇಳಬಹುದು. ಪಶ್ಚಿಮ ಘಟ್ಟಗಳ ಸೊಗಸಾದ ನೋಟವು ನಿಮ್ಮನ್ನು ಮಂತ್ರಮುಗ್ಧಗೊಳಿಸುವುದರಲ್ಲಿ ಅನುಮಾನವೇ ಇಲ್ಲ. ಕೆಮ್ಮಣ್ಣುಗುಂಡಿಯ ಝಡ್ ಪಾಯಿಂಟ್ಗೆ 3 ಕಿ, ಮೀ ಟ್ರೆಕ್ಕಿಂಗ್ ಅನ್ನು ನೀವು ಆನಂದಿಸಬಹುದು.
ಚಾರಣದ ಹಾದಿಯಲ್ಲಿ ಪ್ರಶಾಂತವಾಗಿ ಧುಮ್ಮಿಕ್ಕುತ್ತಿರುವ ಜಲಪಾತವನ್ನು ಕಾಣುತ್ತೀರಿ. ಆಳವಾದ ಕಣಿವೆಗಳು, ಕಡಿದಾದ ಬೆಟ್ಟಗಳಿಂದ ಸುತ್ತುವರಿದಿರುವ ಅದ್ಭುತವಾದ ನೋಟವು ಚಾರಣಿಗರಿಗೆ ಬಲು ಇಷ್ಟವಾಗುತ್ತದೆ. ಸಮುದ್ರಮಟ್ಟದಿಂದ ಸುಮಾರು 1500 ಮೀ ಎತ್ತರದಲ್ಲಿ ನೆಲೆಗೊಂಡಿರುವ ಈ ಮಾರ್ಗದ ಚಾರಣ ಸ್ವಲ್ಪ ಕಷ್ಟಕರ ಎಂದು ಹೇಳಲಾಗುತ್ತದೆ. ಆದಾಗ್ಯೂ ಸಾಹಸಿಗಳ ಫೇವರೆಟ್ ತಾಣ ಇದಾಗಿದೆ.
ಬಾಬಾ ಬುಡನ್‌ ಗಿರಿ
ಕರ್ನಾಟಕದ ಬಾಬಾ ಬುಡನ್‌ ಗಿರಿ ಚಿಕ್ಕಮಗಳೂರಿನಲ್ಲಿರುವ ಮನೋಹರವಾದ ಟ್ರೆಕ್ಕಿಂಗ್ ತಾಣವಾಗಿದೆ. ಪಶ್ಚಿಮ ಘಟ್ಟಗಳ ಸುಂದರ ದೃಶ್ಯಾವಳಿಗಳು ಮನಸ್ಸಿಗೆ ನೆಮ್ಮದಿಯನ್ನು ಉಂಟು ಮಾಡುತ್ತದೆ. ಕರ್ನಾಟಕ ಮಂದಿಯ ಫೇವರೆಟ್ ಟ್ರೆಕ್ಕಿಂಗ್ ತಾಣಗಳಲ್ಲಿ ಬಾಬಾ ಬುಡನ್‌ ಗಿರಿ ಇದ್ದೇ ಇರುತ್ತದೆ.
ಈ ಬೆಟ್ಟವು ಇಸ್ಲಾಂ ಮತ್ತು ಹಿಂದೂಗಳ ಧಾರ್ಮಿಕ ಸ್ಥಳವಾಗಿದೆ. ಹಿಂದೂಗಳು ಇದನ್ನು ದತ್ತಗಿರಿ ಎಂದೇ ಕರೆಯುತ್ತಾರೆ. ಈ ಸ್ಥಳವು ತನ್ನ ಅಪಾರವಾದ ಕಾಡಿನ ಸೌಂದರ್ಯಕ್ಕೆ ಹೆಚ್ಚು ಜನಪ್ರಿಯವಾಗಿದೆ. ಟ್ರೆಕ್ಕಿಂಗ್‌ನಂತಹ ಸಾಹಸ ಚಟುವಟಿಕೆಗಳನ್ನು ಅಂತ್ಯವಿಲ್ಲದೇ ಆನಂದಿಸಲು ಕರ್ನಾಟಕದ ಈ ತಾಣ ಬೆಸ್ಟ್ ಎಂದೇ ಹೇಳಬಹುದು.
ಕುದುರೆಮುಖ
ಕುದುರೆಮುಖದ ಶಿಖರವು ಸಮುದ್ರಮಟ್ಟದಿಂದ ಸುಮಾರು 1894 ಮೀ ಎತ್ತರದಲ್ಲಿ ನೆಲೆಸಿದೆ. ಚಾರಣ ಮಾಡಲು ಬಯಸುವ ಮಂದಿಗೆ ಇದು ಸ್ವರ್ಗವೇ ಸರಿ. ಎಲ್ಲಿ ನೋಡಿದರೂ ಉಸಿರುಗಟ್ಟುವ ವಾತಾವರಣ, ಅರೇಬಿಯನ್‌ ಸಮುದ್ರದ ಸೊಬಗು ಮೋಡಿ ಮಾಡುತ್ತದೆ. ಕುದುರೆಮುಖ ಶಿಖರದಲ್ಲಿ ಕುದುರೆಮುಖ ನ್ಯಾಷನಲ್‌ ಪಾರ್ಕ್‌ ಕೂಡ ಇದೆ. ಇಲ್ಲಿ ವೈವಿಧ್ಯಮಯ ಸಸ್ಯ ಮತ್ತು ಪ್ರಾಣಿಗಳಿಗೆ ನೆಲೆಯಾಗಿದೆ. ಇಂತಹ ಅದ್ಭುತವಾದ ತಾಣಗಳಲ್ಲಿ ಟ್ರೆಕ್ಕಿಂಗ್ ಮಾಡಲು ಯಾರಿಗೆ ಇಷ್ಟವಾಗಲ್ಲ ಹೇಳಿ.
ಕೊಡಚಾದ್ರಿ ಟ್ರೆಕ್
ಕರ್ನಾಟಕದ ಜನಪ್ರಿಯ ಟ್ರೆಕ್ಕಿಂಗ್ ಸ್ಥಳಗಳಲ್ಲಿ ಕೊಡಚಾದ್ರಿ ಮರೆಯುವಂತಿಲ್ಲ. ಪಶ್ಚಿಮಘಟ್ಟಗಳಲ್ಲಿ ನೆಲೆಸಿರುವ ಈ ಕೊಡಚಾದ್ರಿ ಸಮುದ್ರಮಟ್ಟದಿಂದ ಸುಮಾರು 4411 ಅಡಿ ಎತ್ತರದಲ್ಲಿದೆ. ಚಾರಣದ ಹಾದಿಯಲ್ಲಿ ಮೂಕಾಂಬಿಕ ವನ್ಯಜೀವಿ ಅಭಯಾರಣ್ಯವಿದೆ.
ಟ್ರೆಕ್ಕಿಂಗ್ ಹಾದಿಯು ಅಷ್ಟೊಂದು ಕಷ್ಟಕರವಾಗಿರುವುದಿಲ್ಲದಿರುವ ಕಾರಣ ಸುಲಭವಾಗಿ ಯೋಜಿಸಬಹುದು. ಬೇಸಿಗೆ ಕಾಲದಲ್ಲಿ ಟ್ರೆಕ್ಕಿಂಗ್ ಕೈಗೊಳ್ಳುವುದು ಉತ್ತಮವಾದ ಸಮಯವಾಗಿದೆ.
ಮುಳ್ಳಯ್ಯನಗಿರಿ
ಸಮುದ್ರಮಟ್ಟದಿಂದ 1930 ಮೀಟರ್ ಎತ್ತರದಲ್ಲಿರುವ ಮುಳ್ಳಯ್ಯನಗಿರಿಯ ಟ್ರೆಕ್ಕಿಂಗ್ ಮಾಡುವುದು ರೋಮಾಂಚಕವಾದ ಅನುಭವವನ್ನು ಉಂಟು ಮಾಡುತ್ತದೆ. ಚಿಕ್ಕಮಗಳೂರಿನಿಂದ ಕೇವಲ 45 ಮೀಟರ್ ದೂರದಲ್ಲಿರುವ ಈ ಅದ್ಭುತವಾದ ಪರ್ವತದ ಟ್ರೆಕ್ಕಿಂಗ್ ಚಾರಣಿಗರನ್ನು ಚಿರಸ್ಮರಣೀಯ ಅನುಭವವನ್ನು ಉಂಟು ಮಾಡುತ್ತದೆ. ಕಾಫಿ ತೋಟಗಳ ರಮಣೀಯ ನೋಟವು ಸಾಹಸಿಗಳ ಹೃದಯವನ್ನು ಸ್ಪರ್ಶಿಸುತ್ತದೆ.
ಕುಂತಿ ಬೆಟ್ಟ
ಪಾಂಡವಪುರ ಪಟ್ಟಣದಲ್ಲಿ ಎರಡು ಬೆಟ್ಟಗಳ ನಡುವೆ ನೆಲೆಸಿರುವ ಕುಂತಿ ಬೆಟ್ಟವು ಕಬ್ಬಿನ ಗದ್ದೆಗಳು, ಭತ್ತದ ಗದ್ದೆಗಳು ಮತ್ತು ಎತ್ತರವಾದ ತೆಂಗಿನ ವೃಕ್ಷಗಳಿಂದ ಆವೃತವಾಗಿದೆ. ತನ್ನ ಮೋಡಿ ಮಾಡುವ ಸೌಂದರ್ಯದಿಂದ ಸಾಹಸಿಗಳನ್ನು ಆಕರ್ಷಿಸುತ್ತದೆ.
ವಾಸ್ತವವಾಗಿ ಕುಂತಿ ಬೆಟ್ಟವು ಅದರ ಐತಿಹಾಸಿಕ ಮಹತ್ವ ಮತ್ತು ಭವ್ಯವಾದ ನೈಸರ್ಗಿಕ ಸೌಂದರ್ಯವನ್ನು ತನ್ನಲ್ಲಿ ಅಡಗಿಸಿಕೊಂಡಿರುವ ಮಾಂತ್ರಿಕ ಸ್ಥಳವಾಗಿದೆ.
ಭೀಮೇಶ್ವರಿ
ಮಂಡ್ಯ ಜಿಲ್ಲೆಯ ಭೀಮೇಶ್ವರಿ ಬೆಂಗಳೂರಿಗರ ವಾರಾಂತ್ಯ ತಾಣವಾಗಿದೆ. ಟ್ರೆಕ್ಕಿಂಗ್ ಪ್ರಿಯರು ಈ ತಾಣವನ್ನು ಹೆಚ್ಚಾಗಿ ಆಯ್ಕೆ ಮಾಡಿಕೊಳ್ಳುತ್ತಾರೆ. ಟ್ರೆಕ್ಕಿಂಗ್ ಜೊತೆಗೆ ಪ್ರಶಾಂತವಾದ ಸರೋವರದಲ್ಲಿ ದೋಣಿ ಸವಾರಿ ಕೂಡ ಮಾಡಬಹುದು.
ಹಸಿರಿನ ಸಿರಿಯ ವಾತಾವರಣವು ಟ್ರೆಕ್ಕಿಂಗ್‌ಗೆ ಅನುಕೂಲಕರವಾಗಿದೆ. ಅದ್ಭುತವಾದ ದೃಶ್ಯ ವೀಕ್ಷಣೆ ಮತ್ತು ಸಾಹಸ ಕ್ರೀಡೆಗಳನ್ನು ನೀವು ಸಾಕಷ್ಟು ಎಂಜಾಯ್‌ ಮಾಡುತ್ತೀರಿ.
