ದಿನವಿಡೀ ಚೈತನ್ಯದಿಂದಿರಲು ನೀವು ಬೆಳಗ್ಗೆ ಮಾಡುವ ಮೊದಲ ಕೆಲಸಗಳು ಮುಖ್ಯವಾಗುತ್ತವೆ. ಈ ವಿಷಯಗಳು ದೈಹಿಕ ಮತ್ತು ಮಾನಸಿಕ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತವೆ. ನೀವು ಬೆಳಗ್ಗೆದ್ದಾಗ ಈ ತಪ್ಪುಗಳನ್ನು ಮಾಡಬಾರದು ಎಂದು ತಜ್ಞರು ತಿಳಿಸುತ್ತಾರೆ. ಈ ತಪ್ಪುಗಳನ್ನು ಸರಿಪಡಿಸಿದರೆ ನೀವು ಉತ್ತಮ ಜೀವನಶೈಲಿಯನ್ನು ಅಳವಡಿಸಿಕೊಳ್ಳಬಹುದು. ದಿನವಿಡೀ ಚೈತನ್ಯಯುತವಾಗಿರಲು ಯಾವ ತಪ್ಪುಗಳನ್ನು ಮಾಡಬಾರದು ಎಂದು ತಿಳಿಯೋಣ.
ಬಲಕ್ಕೆ ತಿರುಗಿ ಎದ್ದೇಳಿ: ಕೆಲವರು ಬೆಳಗ್ಗೆ ಎದ್ದಾಗ ಬೆನ್ನಿನ ಮೇಲೆ ಮಲಗಿ ಅದೇ ಸ್ಥಾನದಲ್ಲಿ ಕುಳಿತುಕೊಳ್ಳುತ್ತಾರೆ. ಆದರೆ, ಹಾಗೆ ಎದ್ದೇಳುವುದರಿಂದ ಸ್ನಾಯುಗಳಲ್ಲಿ ನೋವು ಉಂಟಾಗುವ ಸಾಧ್ಯತೆ ಇದೆ. ಬೆಳಗ್ಗೆ ಎದ್ದೇಳುವಾಗ ಬಲಭಾಗಕ್ಕೆ ತಿರುಗಿ ನಿಧಾನವಾಗಿ ಎದ್ದೇಳುವುದು ಉತ್ತಮ ಹಾಗೂ ನಂತರ ಸ್ವಲ್ಪ ಚಲಿಸುವುದು ಉತ್ತಮ. ಇದು ರಾತ್ರಿಯಿಡೀ ನಿಷ್ಕ್ರಿಯವಾಗಿದ್ದ ದೇಹದ ಭಾಗಗಳಿಗೆ ರಕ್ತ ಪರಿಚಲನೆ ಹೆಚ್ಚಿಸುತ್ತದೆ. ಇದರ ಪರಿಣಾಮವಾಗಿ ನೀವು ದಿನವಿಡೀ ಚೈತನ್ಯದಿಂದ ಇರಲು ಸಾಧ್ಯವಾಗುತ್ತದೆ.
ಗಡಿಬಿಡಿ ಮಾಡಬೇಡಿ: ಕೆಲವರು ಬೆಳಗ್ಗೆ ಬೇಗನೆ ಎಚ್ಚರವಾಗುತ್ತಾರೆ. ಕಚೇರಿ ಸಮಯದವರೆಗೆ ಏನನ್ನಾದರೂ ಮಾಡುತ್ತಾರೆ. ಇದನ್ನು ಮಾಡುವುದರಿಂದ ಮಾನಸಿಕ ಒತ್ತಡ ಉಂಟಾಗುತ್ತದೆ. ಇದನ್ನು ತಡೆಯಲು ದಿನಕ್ಕೆ ಬೇಕಾದ ತರಕಾರಿಗಳನ್ನು ಕತ್ತರಿಸುವುದು ಹಾಗೂ ಹಿಂದಿನ ರಾತ್ರಿ ಕಚೇರಿಗೆ ಧರಿಸಲು ಉಡುಪನ್ನು ಆಯ್ಕೆ ಮಾಡಿ ಇಟ್ಟುಕೊಳ್ಳುವುದು ಸೇರಿದಂತೆ ವಿವಿಧ ಕೆಲಸಗಳನ್ನು ಮಾಡಲು ಸಲಹೆ ನೀಡಲಾಗುತ್ತದೆ. ಇದು ಮರುದಿನ ಬೆಳಗ್ಗೆ ಯಾವುದೇ ಉದ್ವೇಗವಿಲ್ಲದೇ ಶಾಂತವಾಗಿ ಎಚ್ಚರಗೊಳ್ಳಲು ಮತ್ತು ನಿಮ್ಮ ಕೆಲಸವನ್ನು ಬೇಗನೆ ಮುಗಿಸಲು ನಿಮಗೆ ಅನುವು ಮಾಡಿಕೊಡುತ್ತದೆ.
ಉಪಹಾರ ಬಿಡಬೇಡಿ: ಕೆಲವರು ಕಚೇರಿಗೆ ಸಮಯವಾಗುವುದರಿಂದ ಉಪಹಾರ ಬಿಟ್ಟುಬಿಡುತ್ತಾರೆ. ಆದರೆ, ಈ ಅಭ್ಯಾಸವು ದೀರ್ಘಾವಧಿಯಲ್ಲಿ ರೋಗನಿರೋಧಕ ವ್ಯವಸ್ಥೆಯ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತದೆ. ಬೊಜ್ಜು ಹಾಗೂ ಮಧುಮೇಹದಂತಹ ಸಮಸ್ಯೆಗಳನ್ನು ಉಂಟುಮಾಡುವ ಅಪಾಯ ಹೊಂದಿದೆ. ನೀವು ಬೆಳಗ್ಗೆ ಎದ್ದ ಕ್ಷಣದಿಂದ ಹೆಚ್ಚಿನ ಸಮಯ ಬಳಸಿಕೊಂಡರೆ, ನಿಮಗೆ ಉಪಹಾರಕ್ಕೆ ಸಾಕಷ್ಟು ಸಮಯ ಲಭಿಸುತ್ತದೆ.
ಎದ್ದ ತಕ್ಷಣ ಮೊಬೈಲ್ ಮುಟ್ಟಬೇಡಿ: ಬೆಳಗ್ಗೆ ಎದ್ದ ತಕ್ಷಣ ಅನೇಕ ಜನರು ಮಾಡುವ ಮತ್ತೊಂದು ದೊಡ್ಡ ತಪ್ಪು ಎಂದರೆ ಅದು ಫೋನ್‌ಗಳಲ್ಲಿ ಸಂದೇಶಗಳನ್ನು ಪರಿಶೀಲಿಸುವುದು, ಚಾಟ್ ಮಾಡುವುದು ಹಾಗೂ ಕರೆಗಳನ್ನು ಮಾಡುವುದು. ಈ ಪ್ರಕ್ರಿಯೆಯಲ್ಲಿ ನೀವು ಯಾವುದೇ ನಕಾರಾತ್ಮಕ ಸುದ್ದಿಗಳನ್ನು ವೀಕ್ಷಿಸಿದರೆ, ನಿಮ್ಮ ಮನಸ್ಥಿತಿ ಅಸಮಾಧಾನಗೊಳ್ಳುತ್ತದೆ. ಇದು ನಿಮ್ಮ ಆರೋಗ್ಯಕ್ಕೂ ಒಳ್ಳೆಯದಲ್ಲ ಎಂದು ತಜ್ಞರು ತಿಳಿಸುತ್ತಾರೆ.
ಕರೆಗಳು ಮತ್ತು ಸಂದೇಶಗಳನ್ನು ಮಾಡದ ಹೊರತು ಬೆಳಗ್ಗೆ ಎದ್ದ ತಕ್ಷಣ ಮೊಬೈಲ್‌ಗಳನ್ನು ಮುಟ್ಟದೇ ಇರುವುದು ಒಳ್ಳೆಯದು. ಇದರ ಹೊರತಾಗಿ ನೀವು ಬೆಳಗ್ಗೆ ಎದ್ದ ತಕ್ಷಣ ಸ್ವಲ್ಪ ಸಮಯದವರೆಗೆ ಒಳ್ಳೆಯ ಪುಸ್ತಕ ಓದುವ ಅಭ್ಯಾಸ ಮಾಡಿಕೊಳ್ಳುವುದು ಒಳ್ಳೆಯದು ಹಾಗೂ ಇದು ನಿಮಗೆ ತಿಳಿಯದೇ ಇರುವ ಅನೇಕ ಹೊಸ ವಿಷಯಗಳನ್ನು ಕಲಿಯಲು ಸಹಾಯ ಮಾಡುತ್ತದೆ.
ಈ ಅಭ್ಯಾಸದೊಂದಿಗೆ ಆರಂಭಿಸಿ: ಬೆಳಗ್ಗೆ ವ್ಯಾಯಾಮ ಮಾಡುವುದರಿಂದ ಇಡೀ ದಿನಕ್ಕೆ ಬೇಕಾದ ಶಕ್ತಿ ಹಾಗೂ ಉತ್ಸಾಹ ನಿಮಗೆ ದೊರೆಯುತ್ತದೆ. ಒಂದು ವಿಷಯವನ್ನು ಇಲ್ಲಿ ನೆನಪಿನಲ್ಲಿ ಇಟ್ಟುಕೊಳ್ಳಬೇಕು. ಕೆಲವರು ಬೆಳಗ್ಗೆದ್ದ ತಕ್ಷಣ ಭಾರವಾದ ತೂಕ ಎತ್ತುತ್ತಾರೆ ಹಾಗೂ ಇತರ ಶ್ರಮದಾಯಕ ವ್ಯಾಯಾಮಗಳನ್ನು ಮಾಡುತ್ತಾರೆ. ಇವು ಸ್ನಾಯುಗಳ ಆರೋಗ್ಯಕ್ಕೆ ಅಷ್ಟು ಒಳ್ಳೆಯದಲ್ಲ. ಏಕೆಂದರೆ ನಿದ್ರೆಯ ಸಮಯದಲ್ಲಿ ದೇಹದಲ್ಲಿ ಚಲನೆಯ ಕೊರತೆಯಿಂದಾಗಿ ಬೆಳಿಗ್ಗೆ ಎದ್ದಾಗ ಸ್ನಾಯುಗಳು ಮತ್ತು ಮೂಳೆಗಳು ಗಟ್ಟಿಯಾಗುತ್ತವೆ. ಸ್ನಾಯುಗಳು ಒಂದೇ ಬಾರಿಗೆ ಚಲಿಸಬಾರದು, ಭಾರವಾದ ತೂಕವನ್ನು ಒಂದೇ ಬಾರಿಗೆ ಎತ್ತಬಾರದು ಅಥವಾ ಶ್ರಮದಾಯಕ ವ್ಯಾಯಾಮಗಳನ್ನು ಮಾಡಬಾರದು ಎಂದು ತಜ್ಞರು ಸೂಚಿಸುತ್ತಾರೆ.
ವೇಗವಾಗಿ ವ್ಯಾಯಾಮ ಮಾಡುವ ಬದಲಾಗಿ ನಿಧಾನವಾಗಿ ಚಲಿಸಲು ಪ್ರಯತ್ನಿಸುವುದು ಉತ್ತಮ. ಇದಕ್ಕಾಗಿ ವ್ಯಾಯಾಮಕ್ಕೂ ಮುನ್ನ ಸ್ವಲ್ಪ ಸಮಯದವರೆಗೆ ವಾರ್ಮ್ಅಪ್ ಮಾಡುವುದು, ಯೋಗ ಮಾಡುವುದು ಇಲ್ಲವೇ ಧ್ಯಾನ ಮಾಡುವುದು ಉತ್ತಮವಾಗಿದೆ. ಇದು ಸ್ನಾಯುಗಳನ್ನು ವಿಶ್ರಾಂತಿ ಪಡೆಯಲು ಅನುವು ಮಾಡಿಕೊಡುತ್ತದೆ. ಬಳಿಕ ನಿಜವಾದ ವ್ಯಾಯಾಮ ದಿನಚರಿ ಅನುಸರಿಸಬಹುದು ಎಂದು ತಜ್ಞರು ಸಲಹೆ ನೀಡುತ್ತಾರೆ
