ನವದೆಹಲಿ: ದೆಹಲಿಯ ಕೆಂಪು ಕೋಟೆ ಬಳಿ ನಡೆದ ನಿಗೂಢ ಸ್ಫೋಟದ ವಿಚಾರವಾಗಿ ಹಲವು ಮಹತ್ವದ ವಿಚಾರಗಳು ಬಹಿರಂಗಗೊಂಡಿವೆ. ಸ್ಫೋಟಗೊಂಡ ಕಾರಿನಲ್ಲಿದ್ದ ಡಾ. ಉಮರ್ ಹಾಗೂ ಇತ್ತೀಚೆಗೆ ಪೊಲೀಸರು ಬಂಧಿಸಿರುವ ಉಗ್ರನಿಗೆ ಟರ್ಕಿಶ್ ಹ್ಯಾಂಡ್ಲರ್ ಯುಕಾಶಾ ಜತೆ ನಂಟಿತ್ತು ಎಂಬುದು ತಿಳಿದುಬಂದಿದೆ. ‘ಯುಕಾಸಾ’ ಎಂಬುದು ಹ್ಯಾಂಡ್ಲರ್ ತಮ್ಮ ಗುರುತನ್ನು ಮರೆಮಾಡಲು ಬಳಸುವ ಕೋಡ್ ಆಗಿರಬಹುದು ಎಂದು ಅಂದಾಜಿಸಲಾಗಿದೆ.
ಹ್ಯಾಂಡ್ಲರ್ನ ಸ್ಥಳವು ಟರ್ಕಿಯ ರಾಜಧಾನಿ ಅಂಕಾರಾದಲ್ಲಿ ಪತ್ತೆಯಾಗಿದೆ. ಮಾರ್ಚ್ 2022 ರಲ್ಲಿ ಭಾರತದಿಂದ ಹಲವಾರು ಮಂದಿ ಅಂಕಾರಾಗೆ ಪ್ರಯಾಣಿಸಿದ್ದಾರೆ ಎಂಬ ವರದಿಗಳನ್ನು ಏಜೆನ್ಸಿಗಳು ಪರಿಶೀಲಿಸುತ್ತಿವೆ. ಈ ಸಮಯದಲ್ಲಿ ಅವರನ್ನು ಬ್ರೈನ್ವಾಶ್ ಮಾಡಿರಬಹುದು ಎಂದು ಹೇಳಲಾಗುತ್ತಿದೆ.
ಸೆಷನ್ ಆ್ಯಪ್ ಎಂದು ಕರೆಯಲ್ಪಡುವ ಎನ್ಕ್ರಿಪ್ಟ್ ಮಾಡಲಾದ ಮೆಸೇಜಿಂಗ್ ಪ್ಲಾಟ್ಫಾರ್ಮ್ ಮೂಲಕ ಡಾ. ಉಮರ್ ಮತ್ತು ಬಂಧಿತ ಭಯೋತ್ಪಾದಕ ತಮ್ಮ ಹ್ಯಾಂಡ್ಲರ್ನೊಂದಿಗೆ ಸಂವಹನ ನಡೆಸುತ್ತಿದ್ದರು ಎಂದು ಮೂಲಗಳು ಬಹಿರಂಗಪಡಿಸಿವೆ. ಕೆಂಪು ಕೋಟೆ ಬಳಿ ಸ್ಫೋಟಕ್ಕೆ ಸಂಬಂಧಿಸಿದ ಸೂಕ್ಷ್ಮ ಮಾಹಿತಿಯನ್ನು ವಿನಿಮಯ ಮಾಡಿಕೊಳ್ಳಲು ಮತ್ತು ಕಾರ್ಯಾಚರಣೆಗಳನ್ನು ಸಂಘಟಿಸಲು ಈ ಆ್ಯಪ್ ಅನ್ನು ಬಳಸಲಾಗಿದೆ ಎಂದು ನಂಬಲಾಗಿದೆ. ಡಾ. ಉಮರ್ i20 ಚಲಾಯಿಸುತ್ತಿದ್ದರು ಎಂದು ಡಿಎನ್ಎ ಪರೀಕ್ಷೆಯಲ್ಲಿ ದೃಢಪಟ್ಟಿದೆ.
ಕೆಂಪು ಕೋಟೆ ಬಳಿ ಸ್ಫೋಟಗೊಂಡ ಹುಂಡೈ ಐ20 ಕಾರನ್ನು ಚಲಾಯಿಸಿದ ವ್ಯಕ್ತಿ ಡಾ. ಉಮರ್ ಮೊಹಮ್ಮದ್ ಎಂದು ಡಿಎನ್ಎ ಪರೀಕ್ಷೆಗಳು ದೃಢಪಡಿಸಿವೆ. ಪೊಲೀಸ್ ಮೂಲಗಳ ಪ್ರಕಾರ, ಡಾ. ಉಮರ್ ಅವರ ತಾಯಿಯ ಡಿಎನ್ಎ ಮಾದರಿಗಳು ಸುಟ್ಟ ಕಾರಿನಿಂದ ದೊರೆತ ಮೂಳೆ ಮತ್ತು ಹಲ್ಲಿನ ತುಣುಕುಗಳೊಂದಿಗೆ ಹೋಲಿಕೆಯಾಗಿವೆ.
ತೀವ್ರಗೊಂಡ ತನಿಖೆ
ಅಂಕಾರಾಗೆ ಕರೆದೊಯ್ಯುವ ಹ್ಯಾಂಡ್ಲರ್ನ ಡಿಜಿಟಲ್ ಹಾದಿ ಮತ್ತು ಚಾಲಕನ ಗುರುತು ದೃಢಪಟ್ಟ ನಂತರ, ತನಿಖಾ ಸಂಸ್ಥೆಗಳು ಈಗ ಭಯೋತ್ಪಾದಕ ಸಂಚಿನ ಹಿಂದಿನ ಜಾಲವನ್ನು ಬಹಿರಂಗಪಡಿಸುವತ್ತ ಗಮನಹರಿಸಿವೆ. ಅಧಿಕಾರಿಗಳ ಪ್ರಕಾರ, ಶಂಕಿತರೊಂದಿಗೆ ಸಂಬಂಧಿಸಿದ ಆರ್ಥಿಕ ಸಂಪರ್ಕಗಳು ಮತ್ತು ಸಂವಹನ ಮಾರ್ಗಗಳನ್ನು ಪತ್ತೆಹಚ್ಚಲು ಎನ್ಐಎ ಮತ್ತು ದೆಹಲಿ ಪೊಲೀಸರ ವಿಶೇಷ ಘಟಕದ ತಂಡಗಳು ಸಮನ್ವಯದಿಂದ ಕಾರ್ಯನಿರ್ವಹಿಸುತ್ತಿವೆ.
For More Updates Join our WhatsApp Group :
