ವರದಿ : ಬರಗೂರು ವಿರೂಪಾಕ್ಷ, ಶಿರಾ
ಶಿರಾ : ಆರ್ಥಿಕವಾಗಿ ಬಡತನದ ಬೇಗೆಯಲ್ಲಿರುವ ಅತ್ಯಂತ ಕಡು ಬಡ ಕುಟುಂಬಗಳಿಗೆ ಸರ್ಕಾರಿ ಶಾಲೆಗಳೇ ದೇಗುಲಗಳು, ಕೂಲಿನಾಲಿ ಮಾಡಿ ಸಣ್ಣದಾಗಿ ಕೂಡಿಟ್ಟ ಹಣದಿಂದಲೇ ತಮ್ಮ ಮಕ್ಕಳನ್ನು ಸರ್ಕಾರಿ ಶಾಲೆಗೆ ಕಳುಹಿಸಲು ಯಾತನೆ ಪಡುವಂತಹ ಪೋಷಕರು ತಮ್ಮ ಮಕ್ಕಳನ್ನು ಇಂತಹ ಸರ್ಕಾರಿ ಶಾಲೆಗಳಿಗೆ ಸೇರಿಸುವುದು ಅನಿವಾರ್ಯವೂ ಹೌದು.
ರಸ್ತೆಯ ಗುಂಡಿಗಳನ್ನು ಮುಚ್ಚಲು, ರಸ್ತೆ ಬದಿಯ ನಾಡಜಾಲಿ ಗಿಡ ತೆಗೆಯಲು, ಗುಂಡಿ ಬಿದ್ದ ರಸ್ತೆಗೆ ಮಣ್ಣು ಚೆಲ್ಲುವ ಕಾಮಗಾರಿಗಳು, ನೀರಿಲ್ಲದ ಕೊಳವೆ ಬಾವಿಗೆ ಪಂಪು-ಮೋಟಾರ್ ಇಳಿಸಿದ ದಾಖಲೆಗಳನ್ನು ನೀಡಿ ಅನುದಾನ ಜೇಬಿಗಿಳಿಸಿಕೊಳ್ಳುವಂತಹ ಕೆಲಸಗಳಿಗೆ ಕೋಟಿ ಕೋಟಿ ರೂ.ಗಳ ಅನುದಾನ ನೀಡುವ ಸರ್ಕಾರಗಳು ಇಂತಹ ಸರ್ಕಾರಿ ಶಾಲೆಗಳ ಸ್ಥಿತಿಯನ್ನು ಮಾತ್ರಾ ಕಣ್ಣೆತ್ತಿಯೂ ನೋಡುತ್ತಿಲ್ಲ ಎಂಬುದಕ್ಕೆ ಶಿರಾ ತಾಲೂಕಿನ ಸರ್ಕಾರಿ ಶಾಲೆಗಳ ದುಸ್ಥಿತಿಯೇ ಜ್ವಲಂತ ಸಾಕ್ಷಿ.
ಶಿರಾ ಅತ್ಯಂತ ಬರಪೀಡಿತ ಪ್ರದೇಶವೆಂಬ ಖ್ಯಾತಿಗಂತೂ ಈಗಾಗಲೇ ಒಳಗಾಗಿ ಬಿಟ್ಟಿದೆ. ಕಳೆದ ೨೦ ವರ್ಷಗಳಿಂದಲೂ ಈ ತಾಲೂಕು ಶೈಕ್ಷಣಿಕ ನಗರಿ ಅನ್ನುವಷ್ಟರ ಮಟ್ಟಿಗೂ ತನ್ನ ಬೆಳವಣಿಗೆಯ ವೇಗವನ್ನು ರೇಸ್ ಕುದುರೆಯಂತೆ ಹೆಚ್ಚಿಸಿಕೊಂಡಿದೆ. ನಗರವೂ ಸೇರಿದಂತೆ ಗ್ರಾಮೀಣ ಪ್ರದೇಶದಲ್ಲೂ ಸಹ ಖಾಸಗಿ ಶಿಕ್ಷಣ ಸಂಸ್ಥೆಗಳು ನಾಯಿಕೊಡೆಗಳಂತೆ ಹಬ್ಬಿ ಬಿಟ್ಟಿವೆ.
ದುಪ್ಪಟ್ಟು ಶಾಲಾ ಶುಲ್ಕ ಹೆಚ್ಚಿಸಿಕೊಂಡು ಸುಸ್ಥಿತಿಯತ್ತ ಸಾಗಿರುವ ಬಹುತೇಕ ಖಾಸಗಿ ಶಾಲೆಗಳಿಗೆ ಆರ್ಥಿಕ ಸಂಕಷ್ಟದಲ್ಲಿರುವ ಮಕ್ಕಳು ಎಷ್ಟೇ ಪ್ರತಿಭಾನ್ವಿತರಾದರೂ ಓದಲಾರದಂತಹ ಸ್ಥಿತಿ ಈಗಲೂ ಇದ್ದೇ ಇದೆ. ಖಾಸಗಿ ಶಾಲೆಗಳ ನಡುವೆ ಸರ್ಕಾರಿ ಶಾಲೆಗಳು ಪೈಪೋಟಿ ನಡೆಸುವಂತಹ ದಯನೀಯ ಸ್ಥಿತಿ ಇರುವಾಗ ಕನಿಷ್ಟಪಕ್ಷ ಸರ್ಕಾರಿ ಶಾಲೆಗಳ ಮೂಲಭೂತ ಸೌಲಭ್ಯಗಳನ್ನು ನೀಗಿಸುವ ಕೆಲಸವನ್ನಾದರೂ ಯಾವುದೇ ಸರ್ಕಾರಗಳು ಮಾಡಬೇಕು. ಆದರೆ ಶಿರಾ ತಾಲೂಕಿನ ಸರ್ಕಾರಿ ಶಾಲೆಗಳ ಸ್ಥಿತಿ ಕಂಡರೆ ನಿಜಕ್ಕೂ ಅಚ್ಚರಿಯೇ ಅನ್ನಿಸುತ್ತಿದೆ.
ಶಿರಾ ನಗರವೀಗ ಶೈಕ್ಷಣಿಕ ಹಬ್ ಆಗಿ ಪರಿವರ್ತನೆಗಳುತ್ತಿದೆ. ಬೂವನಹಳ್ಳಿ ಸಮೀಪದ ಸರ್ಕಾರಿ ಜಮೀನಿನಲ್ಲಿ ಕಳೆದ ೧೫-೨೦ ವರ್ಷಗಳಿಂದಲೂ ಮೊರಾರ್ಜಿ ವಸತಿಯುತ ಶಾಲಾ-ಕಾಲೇಜುಗಳು, ಅಟಲ್ ಬಿಹಾರಿ ವಾಜಪೇಯಿ ಶಾಲೆಗಳು, ಅಲ್ಪಸಂಖ್ಯಾAತರ ವಸತಿಯುತ ಪಾಠಶಾಲೆಗಳು ಮೈಕೊಡವಿಕೊಂಡು ನಿಂತಿದ್ದು ಪ್ರತಿಭಾನ್ವಿತ ಶಾಲಾ ಮಕ್ಕಳಿಗೆ ಈ ಶಾಲೆಗಳು ಇದೀಗ ದಾರಿದೀಪವೂ ಆಗಿವೆ.
ಅತ್ಯಂತ ವಿಪರ್ಯಾಸದ ಸಂಗತಿ ಎಂದರೆ ಅರ್ಹ ಕೆಲವೆ ಮಕ್ಕಳು ಈ ಸರ್ಕಾರಿ ವಸತಿಯುತ ಶಾಲೆಗಳಿಗೆ ಓದಲು ಅರ್ಹತೆ ಪಡೆದಿದ್ದು ಉಳಿದ ಮಕ್ಕಳಿಗೆ ಆಯಾ ನಗರ, ಗ್ರಾಮೀಣ ಪ್ರದೇಶದ ಮಕ್ಕಳಿಗೆ ಸ್ಥಳೀಯ ಸರ್ಕಾರಿ ಶಾಲೆಗಳು ಅನಿವಾರ್ಯವೂ ಹೌದು.
ನಂಬಿದರೆ ನಂಬಿ ಬಿಟ್ಟರೆ ಬಿಡಿ ತಾಲೂಕಿನ ಬಹುಪಾಲು ಸರ್ಕಾರಿ ಶಾಲೆಗಳಿಗೆ ಕಿಟಕಿ ಬಾಗಿಲುಗಳೇ ಇಲ್ಲ. ಮಳೆ ಬಂದಾಗ ಒಡೆದ ಹೆಂಚುಗಳ ಮೂಲಕ ಮಳೆಯ ನೀರು ಶಾಲೆಯಲ್ಲಿ ಕೂತ ಮಕ್ಕಳ ಮೇಲೆಯೇ ಸುರಿಯುವಂತಹ ಸ್ಥಿತಿ ಇದೆ. ಕೆಲವು ಶಾಲೆಗಳ ಕೊಠಡಿಗಳ ಗೋಡೆಗಳು ಬಿರುಕುಬಿಟ್ಟು ಅಗಲೋ ಈಗಲೂ ಬೀಳುವ ಸ್ಥಿತಿಯಲ್ಲಿಯೂ ಇವೆ.
ಇನ್ನೂ ಕೆಲ ಸರ್ಕಾರಿ ಶಾಲೆಯ ಹಳೆಯ ಕೊಠಡಿಗಳು, ಶಾಲಾ ಮೈದಾನಗಳು ಕುಡುಕರ ತಾಣಗಳಾಗಿವೆ. ಬೆಳಗಾಯಿತೆಂದರೆ ತಾಲೂಕಿನ ಬಹುತೇಕ ಸರ್ಕಾರಿ ಶಾಲೆಗಳ ಆವರಣಗಳು ಮದ್ಯದ ಖಾಲಿ ಬಾಟಲ್‌ಗಳಿಂದಲೂ ರಾರಾಜಿಸುತ್ತಿವೆ.
ತಾಲೂಕಿನ ಚಿಕ್ಕಸಂದ್ರ ಕಾವಲ್, ಬುಕ್ಕಾಪಟ್ಟಣ, ಹೊನ್ನಗೊಂಡನಹಳ್ಳಿ, ಹೊಸೂರು ಸೇರಿದಂತೆ ಹಲವು ಸರ್ಕಾರಿ ಪ್ರೌಢಶಾಲೆಗಳ ಕೊಠಡಿಗಳು ವ್ಯಾಪಕ ದುರಸ್ಥಿ ಕಾರ್ಯವನ್ನು ಕಾಣಬೇಕಿದೆ. ತಾಲೂಕಿನ ಪಟ್ಟನಾಯಕನಹಳ್ಳಿಯ ಸರ್ಕಾರಿ ಹಿ.ಪ್ರಾ. ಪಾಠಶಾಲೆಯ ೬ ಕೊಠಡಿಗಳ ದುರಸ್ತಿ ಆಗಬೇಕಿದ್ದು ಚಂಗಾವರ, ವಾಜರಹಳ್ಳಿ, ಯಂಜಲಗೆರೆ, ಹೊನ್ನೇನಹಳ್ಳಿಕುಂಬಾರಹಳ್ಳಿ, ಶಿರಾ ನಗರದ
ಜಿ.ಕೆ.ಎಂ.ಹೆಚ್.ಪಿ.ಬಿ.ಎಸ್, ಸಂತೆಪೇಟೆ ಶಾಲೆ, ಶಿರಾದ ಮಟನ್ ಮಾರ್ಕೆಟ್ ರಸ್ತೆಯ ಪ್ರಾ.ಶಾಲೆ ಸೇರಿದಂತೆ ಬಹುತೇಕ ಶಾಲೆಗಳು ಬೃಹತ್ ಪ್ರಮಾಣದಲ್ಲಿ ದುರಸ್ಥಿ ಕಾಣಬೇಕಿದೆ.
ಶೈಕ್ಷಣಿಕವಾಗಿ ಶಿರಾ ಭಾಗದ ಸರ್ಕಾರಿ ಶಾಲೆಗಳ ದುಸ್ಥಿತಿಯನ್ನು ಕಂಡರೆ ನಿಜಕ್ಕೂ ಬೆಚ್ಚಿ ಬೀಳಲೇಬೇಕು. ತಾಲೂಕಿನಲ್ಲಿರುವ ಒಟ್ಟು ಶಾಲೆಗಳ ಪೈಕಿ ಸುಮಾರು ೭೬ ಶಾಲೆಗಳ ಕಟ್ಟಡಗಳು ಸಂಪೂರ್ಣವಾಗಿ ದುಸ್ಥಿತಿಯತ್ತ ಸಾಗಿವೆ. ನೊಂದು ನಲುಗುತ್ತಿರುವ ಈ ೭೬ ಶಾಲೆಗಳಿಗೆ ಸುಮಾರು ೧೦೧ಕ್ಕೂ ಹೆಚ್ಚು ನೂತನ ಕೊಠಡಿಗಳ ಅಗತ್ಯವಿದೆ.
ತಾಲೂಕಿನಲ್ಲಿ 30ಕ್ಕಿಂತಲೂ ಹೆಚ್ಚು ಮಕ್ಕಳಿರುವ ಸರ್ಕಾರಿ ಕಿರಿಯ ಪ್ರಾಥಮಿಕ ಪಾಠಶಾಲೆಗಳಲ್ಲಿ ಕೊಠಡಿಗಳ ತೀವ್ರತೆಯಂತೂ ಹೆಚ್ಚಾಗಿದೆ. ೪೫ ಕೊಠಡಿಗಳು ಸಣ್ಣದಾಗಿ ದುರಸ್ಥಿಗೊಳ್ಳಬೇಕಾಗಿದ್ದು ೫೯ಕ್ಕೂ ಹೆಚ್ಚು ಶಾಲೆಗಳು ಬೃಹತ್ ಪ್ರಮಾಣದಲ್ಲಿ ದುರಸ್ಥಿಗೊಳ್ಳಬೇಕಿದೆ. ಈಗಾಗಲೇ ನೊಂದು-ಬೆAದು ಅರೆ ಜೀವವಾಗಿರುವ ಸುಮಾರು 34ಕ್ಕೂ ಹೆಚ್ಚು ಶಾಲೆಗಳನ್ನು ನೆಲಸಮಗೊಳಿಸುವ ಅಗತ್ಯವೂ ಇದೆ.
ಒಂದು ಅಚ್ಚರಿಯ ಸಂಗತಿ ಎಂದರೆ ಹಾಲಿ ಶಿರಾ ನಗರದಲ್ಲಿರುವ ಇಡೀ ತಾಲೂಕಿನ ಸರ್ಕಾರಿ ಶಾಲೆಗಳ ಉಸ್ತುವಾರಿ ಹೊತ್ತಿರುವ ಕ್ಷೇತ್ರ ಶಿಕ್ಷಣಾದಿಕಾರಿಗಳ ಕಛೇರಿಯೇ ಸುಮಾರು ೬೦-೭೦ ವರ್ಷಕ್ಕೂ ಹೆಚ್ಚು ಹಳೆಯದ್ದಾಗಿದ್ದು ಮಳೆ ಬಂದರೆ ಈಗಲೂ ಸೋರುತ್ತಿದೆ. ಶಾಲೆಗಳ ಕಡತಗಳ, ಶಿಕ್ಷಕರ ಉಸ್ತುವಾರಿ ಹೊತ್ತ ಈ ಇಲಾಖೆಗೆ ಹೊಸದೊಂದು ಕಟ್ಟಡಡವಿಲ್ಲದೆ ನಲುಗುತ್ತಿದೆ. ಮಳೆ ಬಂದರೆ ಇಲಾಖೆಯ ಕಡಗಳೂ ನೆನೆದು ಹೋಗುತ್ತಿವೆ.
ಒಟ್ಟಾರೆ ಶಿರಾ ತಾಲೂಕಿನ ಸರ್ಕಾರಿ ಶಾಲೆಗಳ ಕೊಠಡಿಗಳ ಕೊರತೆ ನೀಗಿಸುವಲ್ಲಿ ಈ ಭಾಗದ ಜನಪ್ರತಿನಿಧಿಗಳು ಸಂಪೂರ್ಣವಾಗಿ ವಿಫಲರಾಗಿದ್ದು ಇನ್ನಾದರೂ ಸರ್ಕಾರ ಹಾಗೂ ಜನಪ್ರತಿನಿಧಿಗಳು ಕಣ್ಣು ತೆರೆಯುವರೇನೋ ಕಾದು ನೋಡಬೇಕಿದೆ.
ನಂಬಿದರೆ ನಂಬಿ ಬಿಟ್ಟರೆ ಬಿಡಿ ತಾಲೂಕಿನ ಬಹುಪಾಲು ಸರ್ಕಾರಿ ಶಾಲೆಗಳಿಗೆ ಕಿಟಕಿ ಬಾಗಿಲುಗಳೇ ಇಲ್ಲ. ಮಳೆ ಬಂದಾಗ ಒಡೆದ ಹೆಂಚುಗಳ ಮೂಲಕ ಮಳೆಯ ನೀರು ಶಾಲೆಯಲ್ಲಿ ಕೂತ ಮಕ್ಕಳ ಮೇಲೆಯೇ ಸುರಿಯುವಂತಹ ಸ್ಥಿತಿ ಇದೆ. ಕೆಲವು ಶಾಲೆಗಳ ಕೊಠಡಿಗಳ ಗೋಡೆಗಳು ಬಿರುಕುಬಿಟ್ಟು ಅಗಲೋ ಈಗಲೂ ಬೀಳುವ ಸ್ಥಿತಿಯಲ್ಲಿಯೂ ಇವೆ.
ಇನ್ನೂ ಕೆಲ ಸರ್ಕಾರಿ ಶಾಲೆಯ ಹಳೆಯ ಕೊಠಡಿಗಳು, ಶಾಲಾ ಮೈದಾನಗಳು ಕುಡುಕರ ತಾಣಗಳಾಗಿವೆ. ಬೆಳಗಾಯಿತೆಂದರೆ ತಾಲೂಕಿನ ಬಹುತೇಕ ಸರ್ಕಾರಿ ಶಾಲೆಗಳ ಆವರಣಗಳು ಮದ್ಯದ ಖಾಲಿ ಬಾಟಲ್‌ಗಳಿಂದಲೂ ರಾರಾಜಿಸುತ್ತಿವೆ.
ಶೈಕ್ಷಣಿಕವಾಗಿ ಶಿರಾ ಭಾಗದ ಸರ್ಕಾರಿ ಶಾಲೆಗಳ ದುಸ್ಥಿಯನ್ನು ಕಂಡರೆ ನಿಜಕ್ಕೂ ಬೆಚ್ಚಿ ಬೀಳಲೇಬೇಕು. ತಾಲೂಕಿನಲ್ಲಿರುವ ಒಟ್ಟು ಶಾಲೆಗಳ ಪೈಕಿ ಸುಮಾರು 76 ಶಾಲೆಗಳ ಕಟ್ಟಡಗಳು ಸಂಪೂರ್ಣವಾಗಿ ದುಸ್ಥಿತಿಯತ್ತ ಸಾಗಿವೆ. ನೊಂದು ನಲುಗುತ್ತಿರುವ ಈ 76 ಶಾಲೆಗಳಿಗೆ ಸುಮಾರು 101ಕ್ಕೂ ಹೆಚ್ಚು ನೂತನ ಕೊಠಡಿಗಳ ಅಗತ್ಯವಿದೆ.
