ಗುಬ್ಬಿ: ತನ್ನ ಮಗುವಿಗೆ ವಿಷ ಉಣಿಸಿ ತಾನು ವಿಷ ತೆಗೆದುಕೊಂಡು ಆತ್ಮಹತ್ಯೆಗೆ ಯತ್ನಿಸಿದ ಪ್ರಾಥಮಿಕ ವರದಿಯ ಘಟನೆಗೆ ಈಗ ಬಿಗ್ ಟ್ವಿಸ್ಟ್ ಸಿಕ್ಕಿದೆ. ಪತಿರಾಯನೆ ಮೊದಲ ಪತ್ನಿಯ ಒತ್ತಾಯಕ್ಕೆ ಮಣಿದು ಎರಡನೆ ಪತ್ನಿ ಹಾಗೂ ಆಕೆಯ ಪುಟ್ಟ ಮಗುವಿಗೆ ವಿಷ ಉಣಿಸಿ ಕೊಲೆಗೆ ಮುಂದಾಗಿರುವ ರೋಚಕ ಘಟನೆ ಪೊಲೀಸರ ತನಿಖೆಯಿಂದ ಬೆಳಕಿಗೆ ಬಂದಿದೆ.
ಗುಬ್ಬಿ ತಾಲ್ಲೂಕಿನ ತ್ಯಾಗಟೂರು ಗೇಟ್ ಬಳಿ ವಾಸವಾಗಿದ್ದ ಇಂದ್ರಮ್ಮ ಎಂಬ ಮಹಿಳೆಯ ಎರಡನೆ ಸಂಸಾರದ ಕತೆಗೆ ಆಕೆಯ 9 ವರ್ಷದ ಹೆಣ್ಣು ಮಗು ದೀಕ್ಷಿತ ಏನೂ ಅರಿಯದೆ ವಿಷ ತಿಂದು ಪ್ರಾಣ ಚೆಲ್ಲಿದೆ. ಜೊತೆಗೆ ಎರಡನೆ ಪತಿರಾಯ ಯತೀಶ್ ನನ್ನು ನಂಬಿ ಬಂದ ಮಹಿಳೆ ಇಂದ್ರಮ್ಮನಿಗೂ ವಿಷ ಪ್ರಾಶನ ಮಾಡಿ ಜೀವನ್ಮರಣ ಹೋರಾಟ ನಡೆಸುವಂತೆ ಮಾಡಿದ ಹೃದಯ ವಿದ್ರಾವಕ ಘಟನೆ ಕಳೆದೆರಡು ದಿನದಿಂದ ರೋಚಕ ತಿರುವು ಪಡೆದುಕೊಂಡಿದೆ.
ಎರಡನೆ ಪತ್ನಿ ಇಂದ್ರಮ್ಮನ ಜೊತೆ ನಿಟ್ಟೂರು ಹೋಬಳಿ ಬೊಮ್ಮರಸನಹಳ್ಳಿ ಗ್ರಾಮದ ಯತೀಶ್ ಎಂಬಾತ ಎರಡನೆ ಸಂಬOಧ ಹೊಂದಿದ್ದನು. ಈ ಬಗ್ಗೆ ಆತನ ಪತ್ನಿ ವಿಜಯ ಅವರಿಗೂ ಗೊತ್ತಿದ್ದು, ಕಾಲಕ್ರಮೇಣ ಎರಡನೆ ಸಂಬOಧ ಕಡಿದುಕೊಳ್ಳಲು ಒತ್ತಾಯ ಬಂದಿತ್ತು. ಮೊದಲ ಪತ್ನಿ ವಿಜಯ ಚಿತಾವಣೆಗೆ ಯತೀಶ್ ತನ್ನ ಎರಡನೆ ಪತ್ನಿ ಹಾಗೂ ಮಗುವಿಗೆ ವಿಷ ಹಾಕಿ, ತಾನೂ ವಿಷ ಸೇವಿಸಿದ ಹೈಡ್ರಾಮಾದ ಸಂಚು ನಡೆದಿತ್ತು. ಆದರೆ ಗುಬ್ಬಿ ಪೊಲೀಸರ ತನಿಖೆಯಿಂದ ಇಡೀ ಸಂಚು ಬಯಲಿಗೆ ಬಂದಿದೆ.
ಕಳೆದ ಎರಡು ದಿನಗಳ ಹಿಂದೆ ಅತ್ತೆ ನರಸಮ್ಮ ತನ್ನ ಸೊಸೆ ಇಂದ್ರಮ್ಮ ಮೇಲೆ ನೀಡಿದ ವಿಷ ಉಣಿಸಿ ಕೊಲೆ ಆರೋಪದ ದೂರಿನ ಮೇರೆಗೆ ಗುಬ್ಬಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಪ್ರಕರಣ ಭೇದಿಸಿದ ಪೊಲೀಸರಿಗೆ ಬೇರೆಯೇ ಮಾಹಿತಿ ಸಿಕ್ಕಿ ಯತೀಶ ಮತ್ತು ಆತನ ಹೆಂಡತಿ ವಿಜಯರನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದ್ದು, ತಾಯಿ ಮಗು ಇಬ್ಬರನ್ನೂ ಮುಗಿಸುವ ಸಂಚು ಹೊರ ಬಂದಿದೆ.
